العاشق المجروح

بسم الله الرحمن الرحيم

السلام عليكم ورحمة الله وبركاته


يا بحر مالك حزين يا شط مالك جريح
بتبكى عالمظلومين ولا على المجاريح
ولا بتبكى قلوب مش عارفة ايه مكتوب
بين الفراق واللقا تايهه في مهب الريح
يا بحر ده حال البشر يا بحر ده طبع الزمن

ناس تسرق الاحلام وناس هى اللى تدفع التمن
ماهو طول مافي انسان بيكره ضحكة الانسان
الحب لازم يتوه في الاسم والعنوان
وازاى نفكر في بكره واحنا مش قادرين
نهرب من الماضى ولا نفارق الاحزان
مشوار عجيب من اوله مكتوب علينا نكمله
وعشان يعيش الورد لازم اى شوك نتحمله
***
دارت قلوبنا ولفت من عذاب لعذاب
ومنين ما نضحك نلاقي الحزن عالابواب
عدينا نهر الحنين ورجعنا ليه عطشانين
حبينا آه بس آه عالفرح مش قادرين
وحلمنا آه بس آه ماللى انكتب عالجبين
مشوار عجيب من اوله مكتوب علينا نكمله
وعشان يعيش الورد لازم اى شوك نتحمله
***
يا مرتاحين في الهوا حاسبوا من الجايين
ده الشر فارد جناحه ويقصد العاشقيين
والفرح بعد السنين ياخوفي يتغير
والحلم بينكم يضيع الحلم بينكم يضيع ويبات ليالي حزين
***
كنا حبايب وعمر الدنيا ما خانتنا
والخوف قابلنا واصبح هو تالتنا
وآه مالغدر لو فرقنا بين قلبين
والحزن يعرف طريقنا وييجي ناحيتنا
***
يا شارد الفكر قولى ناوى تعمل ايه
جواك الم والالم بيزيد في قلبك ليه
وايه نهاية السكوت والفكر والغيرة
بتحب ولا بتكره ولا عايز ايه
***
عملت ايه يا زمن في الحب والاحباب
كان لي وليف بعشقه فاتلى دموع وعذاب
بعد الحنين والسنين بعد الحنين والسنين طلع الامل كداب
فين ضحكتى وفرحتى قلبي وحبايبي فين
ابكى على نفسي ولا ابكى عاللى غاب
***
ويهون عليك يا قدر تعمل كده فينا
وتخطف الضحكة منا ونبقي وحدينا
هاتعمل ايه يا قدر لسة كمان وكمان
راح اللى راح واللى جاى بيخبي ايه لينا
***
ياقلبي مالك تملى بالالم موعود
والحزن جواك يا قلبي ليه مالهش حدود
نهرب من الماضي وندور على بكره
وبكره ييجي ونفس الجرح فيه موجود